कविता - रवीन्द्र दामोदर लाखे

विस्तार

तुझा विस्तार करीत गेलो तर कुठं कुठं पोहोचलो मी

थर मध्ये कच्छ मध्ये हिमालयात नागालॅण्ड आसामवगैरे

सगळं राष्ट्रगीतच पालथं घातलं तर तिथं कुठला प्रदेश दिसेना-

आव्याका बाहेर गेलास तू –

मखर करता येईल थर्मोकोली तुझ्या स्तुती शब्दांच –

बसावं लागेल तुला आत –

बाहेर टाळ कुटाळ वाजतील धर्म अधर्माचे –

त्या आवाजांनी तुला घाम फुटू दे

तुझ्या पायाखाली तुझ्या घामाचा समुद्र उसळू दे

विसर्जन होईल आपोआप तुझं

नि थर्मोकोली मखर तरंगत राहील काही काळ –

स्तुतीसुमने पूर्ण सडेस्तोवर

ख्रिस्तायन